Capiz amo ang Venue sang Western Visayas Regional Athletic Association ukon WVRAA meet halin MArso 15-21, 2009
ROXAS CITY – Siento porsiento na nga preparado ang tanan para sa pagbukas sang anum ka adlaw nga Western Visayas Regional Athletic Association ukon WVRAA meet sa maabot nga Domingo, Marso 15, 2009.
Ini ang ginpasiguro ni Capiz Governor Victor Tanco Sr. sa pagpakig-angut sang Bombo Radyo Roxas.
Suno sa gobernador plantsado na ang tanan nga mga playing venues kalakip na ang mga billeting areas sang mga delegado nagikan sa anum tanan ka probinsyahanan. Kadungan dire, ginpasiguro man ni Gov. Tanco ang hugot nga siguridad sa pagpatigayun sang nasambit nga sports activity kun sa diin nahibalu-an gikan dire nga may yara sila sang coordinasyun kay Capiz PNP Provincial Director Sr. Supt. Josephus Angan.
Samtang, nakunpirmar gikan kay Gov. Tanco nga si Senador Mar Roxas ang mangin dinapit nga bisita sa opening ceremony sang WVRAA meet 2009 kag ginala-uman man sang gobernador sang probinsya nga ang tanan nga mga gobernador gikan sa lima ka mga ka probinsyahanan ang magapadulong dire sa probinsya sang Capiz para sa amo nga kahiwatan.
Source: Bomboradyo.com
